Pengawa lebuh Maia Cuti Bulan Dua (February - March 2012)

Activity Di menua Lebuh Maia Cuti Bulan Dua (February - March)

                                 Anak daddy nadai nemu jenuh, semampai ngiga utai dikachau. Macham-macam ulah ngasuh aku geli ati. Nadai nemu jako anang, semua sigi ka di kachau magang.

                                     Saioh & Gerang dua-dua sama manchal, iya ke besai nyadi guro ke mit. Bela bebai ngachau utai, kin kia betundi nadai nemu ngetu. Semadi tindu baru enda chapuh dirumah laban seduai.

                                      Lebuh maia ti ngabas sawit aku di Machan, kira setaun lebih nyau tau iya di kemuah ila deh. Tu meh pengawa anak Kampung baka aku ti lebuh maia cuti pulai kemenua. Gambar nya lebuh maia ngabas bala entua aku enggau bala ari jerangku ngetau padi ti ditanam ba madang sawit.

                                        Sawit ti baru ditanam kira-kira 8 bulan ke udah. Jampat amat iya mansang, tambah mega ditanam ke padi diak. Ni enda deh laban ti lebuh nabur sum padi, sama ga iya enggau share diak. Nyau enda sabar tu ka nganti sawit bebuah magang, nyau enggai asai bekuli ba company nyamai agi gawa kediri.

                                 Lantang ati ga meda ninjau ari tuchung bukit umai @ kebun.

                                       Bisi ga cerita lebuh ti ngetau padi kena 11 March 2012. Tumu pagi nganjung bala ke ngetau, udah nya mulai kediri kerumah. Kira baru pengelama nginsap sebatang insap meh dinga telefon sida ke turun madah ke bulih ripong semak langkau umai. Nama deh nyau ga tudah aku ngesah sida kin, naka pengaga meh sida. Tang meh laban agi bepegai ba pengarap lama, diak deh sida enda nyadi ngetau ga sarinya. Lalu utai ke nyadi nya deka diintu, nitih ke padah sida ketuai laban nya lava kitai idup kenu ko sida. Tambah mega ripong nya betelu, bisi kira-kira empat belas igi. Diak deh pagi 12 March 2012, utai ke nyadi nya diintu di umai. Iya ga ari aku nurun kerja, nasib ga flight aku bisi laun mimit nya alai sempat ga enggau betunu ke jani ke dikena nyengkelan umai.

                                    Ha...ha..ha.. tu iya pengawa lebuh maia lemai ari. Kadang-kadang bala datai ngusung aku di rumah, jamming ngena instrument ke bedau tentu cukup. Bulan baru engka iya lengkap agi, mupuk meli. Abo benung megai micropon ke Norman ke mai lagu Wonderful tonight, ukai main-main agi.