Cerita Bekebun Trip Cuti Bulan March 2014 tu kemari

Anak aku posing sebedau ngemuah buah terung. Cukup nyamai ditanam sayur terung iban, enda entu meraya serta nyamai di jaga. Tanam ba madang sawit enda kiruh nabur baja, asal meri baja sawit nya meh baja iya. Sekali ngemuah sampai 300Kg hasil ya, sebulan sampai 3 kali ngemuah. Serta ngemuah ya cukup mudah nadai beleman terus simpan dalam guni lalu panggai ke dalam Hilux. Serta sambutan ba pasar tamu pan cukup manah lebih agi di menua Bintulu enggau Miri.

Lebuh maia ti ngaga tanju langkau kebun. Laban ti rindu meda ya tegap serta tan agi, semua papan tanju ngena kayu tebelian magang. Semua sepiar tebelian nadai dibuai dibelah mit mit nyadi ke papan tanju serta utai bukai ke ulih gaga ngena iya.

Sawit baru tiga taun tang udah mansut ke hasil. Serta buah ya pan ngasuh ati ransing berat sampai bebelas kilo setandan. Sawit aku di Bukit Tibu, Machan.

Baru udah dikupas dan serta rumput sebelah madang sawit ngambi ke beresi serta nyamai agi alai ngemuah sawit lebih agi ngumpul buah rarah. Sawit aku di Bukit Tibu, Machan.

Anak bujang aku duduk ba tanju lebuh ti enggau ine ya ngemuah terung iban.

An action, ka nyadi tauke sawit keno ko ya berangan angan. Ka amat enggau ke kebun enda ngira ari panas enggau ujan. Ngambi riri nemu pengawa bekebun serta enda ginci ginci enggau ke tanah serta teleba nemu bakani ko ngereja pengawa jemah.

Benung kisuk bebuka ke tong racun sebedau belabuh manchit rumput ba kebun sawit aku di Setubu, Pakan.

Ngetu tengah hari pengudah ti manchit, makai ba kerangan. Lantang seput serta berasai tenang fikir tambah mega celap taja pan udah bendar ngelaban panas di madang sawit. Ai sungai ti ciru serta celap.

Bebala maioh nungku di langkau kebun pengudah ti tembu ngetau ba Umai mak aku di Madang Sawit aku Kerangan Rian, jalai Kanowit Julau.

Pengawa berayar ke padi kena muai ampa, sekeda muput kena ngesuh ke ampa padi.

Dunjung buah sawit sekeda ke udah di tugung ke bala kuli lebuh ti ngemuah sawit aku Di Setubu, Pakan Julau. Sawit baru manggai 3 taun.

Benung ka loading buah sawit ke dalam hilux sebedau mulai kediri ke rumah.

Daud benung nusun buah sawit ba atas hilux ngambi ke ulih ngundan padat agi.

Hilux penuh tubuh ga 4 iko, terpaksa meh dua iko duduk atas buah sawit. Umbas ya ga pejalai ari Pakan ke Machan bisi 45 minit. Ka pan enda ngidup ke seput ga.